ROXAS CITY – Ginpasalig ni Provincial Jail Warden Arjuna Yngcong sang Capiz Rehabilitation Center (CRC) nga wala sang nagakahinabo nga transaksyon sang iligal nga droga sa sulod sang amu nga pasilidad.
Sa interview sang Bombo Radyo kay Yngcong, ginsiling sini nga sumugod sang nakabalik ini sa pagdumala sang CRC, ginatinguhaan sini nga malimpyo batuk sa iligal nga bulohaton kag droga ang Rehabilitation center.
Sa pagkamatuod, wala sang nakuha nga mga ginabawal nga pagkabutang sang nagpatigayon sang sorpresa nga ‘oplan galugad’ sa mga kagamitan sang Persons Deprived of Liberty (PDLs).
Nahibaluan nga ini ang sabat ni Yngcong sa akusasyon sang isa ka reporter sang radio station batuk sa contractual sang Provincial Capitol apang assigned sa CRC bilang jail guard nga si Jasper Genoves, nga ginaalegar may nagakahinabo nga transakyon sang iligal nga droga sa mga inmates.
Matandaan nga hapon sang Sabado, Mayo 13, ginpatigayon sang Criminal Investigation and Detection Group (CIDG) Capiz ang entrapment operation sa Brgy. Lawaan malapit sa CRC, kun sa diin ginreport ni Genoves sa mga otoridad, rason sa pagkasa sang operation nga ginkaaresto sang reporter.
Suno kay Yngcong nga nakasugid sa iya si Genoves nga ginaakusaran ini sang reporter nga may transakyon sang iligal nga droga sa CRC, apang wala ini nakamuno sa provincial warden nga may matabo nga entrapment operation.
Mensahe ni Yngcong nga kun matuod ang akusasyon sang reporter, kinahanglan sini sang mabakod nga ebidensiya bangud indi ini luyag nga mamantsahan ang iya pagdumala sa CRC.
