JAMINDAN CAPIZ – May yara na sang ginalantaw nga person of interest ang katapo sang Jamindan Municipal Police Station sa natabo nga asud-asud nga pagkinawatay sa Barangay Lucero, Jamindan Capiz.
Sa interview sang Bombo Radyo PCpt. Joebert delos Reyes, hepe sang Jamindan Municipal Police Station ginpahayag sini nga nagahulat na lamang sila sang complainant nga magpadulong sa ila talatapan agud masuguran ang mga tikang nga ila pagahimuon.
Matandaan nga wala sang kahadlok nga ginsulod sang kawatan ang tindahan mismo ni Punong Barangay Analie Benedicto sang Barangay Lucero, sa amu nga banwa kag natigayon nga mataban ang masobra P9,000.00 nga cash nga kita subong man ang isa ka puluy-an kun sa diin nakuha sang mga kawatan ang pila ka mga importante nga butang.
Suno kay Delos Reyes, ang mga lugar nga masami ginatarget sang kawatan madulom kag suludlon rason nga mabudlay matul-id ang mga ini.
Ginapahayag nga yara sa 3 tubtob 5 ka mga persona ang yara sa likod sang pagpangawat.
Bangud sini, nagpaandam ang hepe sa mga pumuluyo nga mag-andam kag ipabilin ang hugot nga seguridad sa ila mga puluy-an ilabi na kun may laktan.
