Kun magtipid ikaw sa pagkaon kag kun ang imo nga magasto ang yara lang sa kapin 70 pesos kada adlaw, ano ayhan ang sarang kadtuan sang imo gintipon nga kwarta?
Masarangan mo ayhan nga makabakal sang balay?
May yara nga isa ka babaye nga 70 pesos lang ang iya gasto sa pagkaon kada adlaw kag magpati ka man ukon indi, nakabakal ini sang balay.
Ini amo si Saki Tamogami, isa ka 37-anyos nga real-estate agent, kag kilala sa Japan bilang pinakamatipid nga babaye bangud sa iya commitment sa paggasto sang tuman ka gamay sa pagkaon kag mangin sa mga kinahanglanon sini.
Sang 19-anyos ini nagsugod sa pagtipid sang kwarta.
Sa edad nga 27-anyos, nakatipon ini sang kwarta halin sa iya sweldo kag nagbakal sang balay sa Saitama, north sang Tokyo, sa balor nga 10 million yen ($69,000).
Makaligad ang pila ka tuig, nakabakal ini sang iya ika-duha nga balay sa balor nga 18 million yen ($124,000), kag makaligad pa ang lima ka tuig, nabakal sini ang ikatatlo nga balay sa balor nga 37 million yen ($256,000).
Sa pihak nga nalab-ot sini ang iya handom, padayon gihapon ini nga nagakabuhi nga matipid kag nagatipon sang kwarta agud nga magbulig sa mga gin-rescue nga kuring.
Nakabukas naman ini sang cat cafe sa ground floor sang isa sa iya nga mga balay kag plano nga mag-invest sa iban nga properties sa palaabuton.
