Matapos nga ginpakita sa partial kag unofficial count sang Comelec nga yara siya sa ika-17 nga pwesto sa palumba sa pagka-senador, gin-ako sang singer-lawyer kag kaalyado ni Duterte nga si Jimmy Bondoc nga indi pa maathag subong kun magadaug siya sa eleksyon.
Sa iya Facebook post sadtong Mayo 13, nagpanawagan si Bondoc sa iya mga sumalakdag nga engganyuhon ang gobyerno nga ibalik si anay Presidente Rodrigo Duterte gikan sa International Criminal Court (ICC) sa The Hague, Netherlands.
Kadungan sini, ginhingyo man sini nga indi pag-ipit si Bise Presidente Sara Duterte nga nagapangatubang sang impeachment trial may kaangtanan sa alegasyon sang korapsyon kag ginaalegar pagkunsabo sa pagpahalin kay Presidente Ferdinand Marcos Jr.
Si Bondoc nakabaton sang masobra 10.3 milyones ka boto apang nagkulang sang masobra 2.6 milyones agud makasulod sa “Magic 12,” sa diin si Senador Imee Marcos ang yara sa ika-12 nga pwesto.
Apisar nga nadismaya, ginpasalamatan ni Bondoc ang iya mga sumalakdag kag ginpahayag nga ang eleksyon isa ka “temporary battle.” Ginhatagan niya sang importansya ang kinahanglanon nga hunahunaon sing madalom ang mga isyu nga ginaatubang sang pungsod.
Si Bondoc ang anay opisyal sang PAGCOR kag kilala nga supporter sang pamilya Duterte.
