ROXAS CITY – Nagpasalamat si Jose ‘Pepe’ Del Rosario sa tanan nga pumuluyo sang probinsya sang Capiz nga nagbulig, nagsuporta, naghatag sang pagsalig kag pagpalangga sa iya agud malab-ot niya ang iya kadalag-an.
Sa interview sang Bombo Radyo kay ‘Pepe’ Del Rosario, ginpahayag sini nga tuman gid ang iya kalipay matapos mahibaluan nga siya ang nagapanguna nga board member sa probinsya.
Suno kay Del Rosario nga wala ini nagalaum nga siya ang magapanguna bangud mapag-on man ang iya mga kasumpong, madamo sang eksperensya kag hinimuan.
Nagapasalig si Del Rosario sa tanan nga pumuluyo nga himuon niya ang iya kutob masarangan nga makaserbisyo sa kadam-an kag mabaylohan niya sang maayo ang pagpalangga nga ginhatag sa iya agud indi mapaslawan ang mga pumuluyo sang probinsya.
