MANILA – Gin-isplikar ni Senador Bong Go ang maragtason sini nga pagdaog sa eleksyon nga indi lamang para sa iya kaugalingon kundi isa ka pagdaog nga ginpaambit kay anay Presidente Rodrigo Duterte, kun sa diin ginkabig nya nga mentor kag inspirasyon sa serbisyo publiko.
Suno sa iya, ang kadalag-an nya, kadalag-an man sang anay Presidente Rodrigo Duterte.
Si Go nga may yara sang kabug-usan nga kapin 27 Million ka mga boto kag nagapanguna sa 2025 senatorial race nagpahayag nga ang iya pagpanglakaton sa patag sang politika kag pilosopiya sa pagpangalagad ang nahasa sa idalum sang liderato ni Duterte.
Ginbalikan man ni Go, ang anay mga nagligad nga pag-upadanay nila sang anay Presidente Duterte, sumugod sang nag updanay ini sila sa pagtaklas sa kabukiran sang Davao City tubtob sa nagpadulong na ini sila sa Malacañang.
Ginpakigbahin man sini nga ang ginhabilin sa iya ni Duterte nga sa tion sya ang magdaog sa pagka-senador, ipabilin ang paging mapainubuson kag kinahanglan naka sentro sa katawhan ang pagpangalagad.
Nagsugod sa pag-asister si Go kay anay Davao City Mayor kag anay Presidente Rodrigo Duterte bilang personal aide sini sang tuig 1998 kun sa diin nag-umpisa ini sa pag-atubang sa adlaw-adlaw nga mga buluhaton kag personal nga mga lakat, kun sa diin nagtuga sang isa ka malawig nga personal kag propesyonal nga relasyon. Sang nagpadalagan si Duterte para sa pagkapresidente kag nagdaog, pormal siya nga nagsulod sa nasyonal nga atensyon. Ginpili siya bilang Special Assistant sini.
Sa pihak sang kadalag-an sang amu nga senador, nagahinyo ini sa nasyon sang mga pag-ampo para sa ikaayong lawas kag kahilwayan ni Duterte sa tunga sang ginapangatubang sini nga mga pagtilaw.
Samtang, suno kay Senator Go, ang kolektibo nga kadalag-an sang DuterTEN slate—nga nagalakip sang re-election sanday Senador Ronald “Bato” dela Rosa kag Rodante Marcoleta — amo man ang kadalag-an ni Duterte.
Nagpabutyag man sang hugot nga pagpasalamat si Senador Go sa nasyonal nga suporta nga ginhatag sa iya ilabi nagid sa mga lugar nga ginpasiguro niya nga indi pagpabay-an.
Samtang nagapreparar si Senator Go para sa iya ikaduha nga termino sa Senado, ang iya katapusan nga saad sa publiko amo ang isa ka matuod nga pasalamat kag kasiguraduhan.
