Nagdangat na sa kabug-usan nga P129.39 million ang balor sang kahalita nga gintuga sang Kanlaon eruption sa sektor sang pagpanguma, suno sa Department of Agriculture (DA).
Ini ang naka-apekto sa pangabuhianan sang kabug-usan nga 1,431 mangunguma nagikan sa Negros Island kag nakapanghalit sa masobra 580 ektarya sang mga sakahan.
Dako nga porsyento sang nasambit nga danyos ang sa sektor sang high value crops nga nagbalhag na sang P124.93 million. Ini ang kabaylo sang ay 5,311 tonelada sang mga agri products.
Sumunod diri ang rice industry nga ginabulubanta nga aabot sa masobra tatlo ka milyo ang nangin kahalitan.
Ang nabilin amo ang pagatungaon na sang iban pa nga industriya kasubong sang livestock, poultry, kag corn industry.
Sa karon, may yara sang kabug-usan nga 771 nga nagkalain-lain nga sahi sang sapat ang gin-evacuate sa mga ginhimo nga evacuation center para sa mga sapat.
Naka-standby naman ang P1 billion nga quick response fund sang DA nga mahimo nga magamit sa rehabilitation kag recovery sang mga lugar nga naapektuhan sa padayon nga pag-alburoto sang nasambit nga bulkan.
