ROXAS CITY – Nagalab-ot sa 1,236 hektarya nga ulumhan ang nagkalapiyerde sa banwa sang Panay dala sang pagbaha sang bagyong Agaton.
Samtang yara naman sa 1,942 nga fishponds ang nagkalaguba, 73 ang mga fish cages kag 20 ka mga sakayan kun sa diin ginabulubanta nga naglab-ot sa kabug-usan nga P40,761, 962.
Suno sa datos sang MDRRMO Panay yara sa 15,336 ka mga pamilya ang apektado maluwas sa Barangay Agojo kag Barangay Buntod samtang isa naman ka balay ang totally damaged.
Mahibaluan nga ang banwa sang Panay ang tuman nga naapektohan sang pagbaha.
Sa karun gina-preparar na sang LGU Panay ang paggamit sang quick response fund sang ila calamity fund para sa pagbakal sang mga foodpacks sa 4,000 ka mga pamilya.
Ini na ang ikaduwa nga hugnat sang pagpanghatag sang foodpacks sa banwa sang Panay.
Matandaan nga re-enacted budget man ang LGU Panay matapos nga wala pa maaprobahan ang budget para sa tuig 2022.
