ROXAS CITY – Nagdangat sa P693, 311, 587 ang nangin kahalitan sang Bagyong Agaton sa aquaculture kag fisheries sector sa probinsya sang Capiz.
Ini ang ginkumpirmar ni Mr. Edwin Javier, Provincial Director sang Bureau of Fisheries and Aquatic Resources (BFAR) sang mainterview sang Bombo Radyo.
Ba-se sa damage report nga ginsumiter sang kada banwa, nagdangat sa P666 milyon ang nangin kahalitan kalakip na diri ang mga punong kag fish cages.
Naglab-ot man sa 3,052 ka mga fisherfolks ang apektado kag mas o menus 4,500 ka ektarya sang punong ang nahalitan sang nasambit nga bagyo.
Posible pa nga magbag-o ang nasambit nga datus bangud sa karon stocks pa lamang ang na-validate sang BFAR.Nagahimo na sang lihok ang ahensiya kun ano pa ang sarang mabulig ukon mahatag nga ayuda sang gobyerno sa mga apektado nga sektor.
Nauna diri ginpasiguro ni Javier, nga “take all” ang bulig nga mabaton sang mga apektado nga fisherfolks may permit man sila ukon wala.
Nahibaluan nga libre ang magparehistro ang himoon lamang nga magpadulong sa Municipal Agricultural Office sa mga banwa.
Samtang ginaganyat man sini ang mga fisherfolks ukon nagapanag-iya sang sakayan pandagat nga magkuha sang insurance bangud pananglitan nga may aksidente nga matabo may mabaton ini nga bulig ukon ayuda gikan sa talapatan.
