ROXAS CITY – Yara sa masobra P5,000 ang nangin halit sang sunog nga nagluntad sa isa ka hulot sa Sanecra Subdivision, Barangay Gabuan, Roxas, City.
Ang balay ang ginapanag-iyahan ni Maricel Ortega.
Sa interview sang Bombo Radyo kay FSInsp. Michael Lopez, Acting City Fire Marshal sang Roxas City Fire Station, natalupangdan sang hinablos ni Ortega ang asu nga nagahalin sa iya kwarto sa diin sa iya pagtsekyar nakit-an sini nga nagakalayo na ang amu nga hulot.
Madasig nga nagpangayo sang bulig ang pamilya kag napalong ang kalayo sa bulig sang mga katapo sang BFP-Roxas City.
Nagaguwa sa imbestigasyon sang BFP-Roxas City, kun pagabasehan ang inagyan sang kalayo posible gintunaan sang sunog amu ang nakasaksak nga extension wire sa diin nakasaksak man ang ceiling fan.
Pahanumdum ni Lopez sa publiko nga mangin mahalong kag siguraduhon nga nakakas sa saksakan ang mga appliances agud malikawan ang sunog.
