Apisar malain ang tyempo kag padayon nga nagabubo ang makusog nga ulan nga dala sang Bagyong Kristine, ang pila ka mga residente sang Sitio Pangayawan, Barangay Tacas, banwa sang Pontevedra nagareklamo sang ila sitwasyon pag-abot sa tion sang tig-ululan tungod sa tubig baha nga ila naaagom.
Sa interview sang Bombo Radyo kay nanay Maria Jocelyn Brillantes, residente sang nasambit nga lugar, ginapahayag nga madugay na nila nga ginasapar ang tubig baha sa kada tion nga mag-inulan sa ila lugar.
Dugang pa sini, indi lamang ang pagtaas sang tubig ang ila sini nga ginakabalak-an kundi mangin ang mga sapat nga ginaanod sang tubig-baha ang ila man sini nga ginakahadlukan kasubong sang man-og.
Mahibaluan, nga sobra napulo na nila ka-tuig nga pag-istar sa lugar, suno kay nanay Maria, tatlo na ka tuig ang ila nga pag-antos pag-abot sa sitwasyon sang pagbinaha nga kun sa diin ginasulod naman ang ila tagsa ka mga puluy-an.
Panawagan sang mga pumuluyo sang Sitio Pangayawan, nga kuntani aksyonan na kag masolusyunan na ang ila sini nga ginparoblema sa tion sang tig-ululan.
