ROXAS CITY – Wala sang foulplay ang kamatayon sang 17 anyos nga dalagita nga nagabusong nga nasapwan nga wala na sang kabuhi sa sulod sang hulot sa ila balay sa Blk. 1, Malipayon Village, Barangay Tiza, Roxas City.
Ini ang ginpahayag sang medico-legal sang Capiz Provincial Crime Laboratory Office nga si Police Lieutenant Colonel Joe Martin Fuentes sang mainterview sang Bombo Radyo.
Suno kay Fuentes nga sandig sa ila eksaminasyon, naglupok ang appendix sang biktima nga nagresulta sa pagka-impeksiyon kag naglapta sa iya bilog nga lawas.
Ginpahayag sini nga kun maglupok ang appendix, dako ini nga halit sa lawas sang tawo kun indi gilayon mabulong sang antibiotics ukon maoperahan.
Gindugang pa sini nga indi malayo nga nainom sang biktima ang bulong nga ‘Mefenamic Acid’ nga narekober sa higdaan sini agud madula ang sakit sang iya tiyan nga nabatyagan tuga sang impeksiyon.
Ginklaro man sini nga ang naangkon nga mga gaob sa butkon kag liog sang biktima ang bangud sa “post mortem lividity ukon livor mortis”.
