ROXAS CITY, CAPIZ- Nakabalik na sa Capiz Rehabilitation Center ang isa ka babaye nga Person Deprive of Liberty matapos ini nga nakapalagyo.
Ang nasambit nga babaye amo si Ginalyn Amangca, 30-anyos kag residente sang Barangay Libas, Roxas City.
Sa intreview sang Bombo Radyo kay Arjuna Yngcong, Jail Warden sang CRC, iya ginpahayag nga natalupangdan sang mga jail guard sa ginpatigayon nga headcount nga may kulang sa numero sang mga babaye nga preso.
Suno kay Yngcong, nakapalagyo si Amangca pamaagi sang pagtaklas sa mga ginpanglundo-lundo nga mga balde agud malapawan ang pader kag magpalagyo sa presuhan.
Bangud sini, gilayon nga nagpatigayon sang hot pursuit operation ang gintingub nga pwersa sang Roxas City Police kag Capiz Rehabilitation Center.
Natultulan si Amangca sa balay sang isa kakilala sini sa Barangay Lawaan, Roxas City.
Dugang ni Yngcong, ginsiling sa iya sang amo nga PDL nga birthday sini sa masunod nga adlaw kag luyag nga makita ang iya nga bata, rason nga nagpalagyo ini sa amo nga pasilidad.
Nahibaluan nga si Amangca ang may anom na ka bulan nga nakahunong sa amo nga pasilidad sa diin nagapangatubang ini sa kaso sa paglapas sa Republic Act 9165 ukon “Comprehesive Dangerous Drugs Act of 2002.”
Interviewed by Bombo Sunnie Mae Constantino Batencila
