PRESIDENT ROXAS, CAPIZ – Wala na makapugong sang iya hibubun-ot si Liga President Punong Barangay Ferdinand Bacanto matapos nga ginbanatan ni Mayor Receliste Escolin sa iya nga Facebook Live nahanungod sa pag-recall sa mga Barangay Kapitan sa pagpirma sa MDC resolution.
Suno kay Bacanto nga dungol si Escolin kag wala nagapamati kun hambalan kag iya lang nga gusto ang masunod permi.
Gindepensahan man ni Bacanto kag ginatadlong ang resolution sandig sa naistoryahan sa ginpatigayon nga meeting.
Ginklaro man sini nga wala niya ginpatawag ang mga Kapitan para lang hambalon nga liwaton ang resolusyon kag indi sila pagpapirmahon.
Samtang, aminado naman si Bacanto nga naistoryahan nila sadto ang term sharing sa pagiging Liga President apang wala man ini sang pinirmahan sa amu nga kasugtanan gani wala sang rason nga magpanaog ini sa pagka-presidente sang Liga.
Dugang pa ni Bacanto nga dapat untaton na ni Escolin ang pag-atake sa iya sa mga Facebook Live sini kay kun mapuno ini igaladlad sini ang mga ginatago sang alkalde.
Pahayag pa ni Bacanto nga wala danay ginapaminsar ni Escolin ang iya ginawakal sa mga FB Live sini kag natingala kun ngaman gina-atake siya nga wala man ini nagapapili sa palaabuton nga eleksyon.
