ROXAS CITY – Ginakulbaan apang may lakot nga kasadya ang nabatyagan sang panibag-o nga kapitan sang Barangay Culasi matapos ginpili ini nga magtal-os sa posisyon ni anay kapitan Inday Teresa Almalbis nga sa karon bise-alkalde na sang syudad.
Sa interview sang Bombo Radyo kay Punong Barangay Bernie Barrientos, panibag-o nga kapitan sang Barangay Culasi, lakot ang iya emosyon bangud wala pa ini nahibaluan ang bug-os nga obligasyon sang isa ka kapitan, apang suno diri hugot sa iya tagipusuon kag wala siya nagduha-duha nga batunon ang oportuninad nga ginhatag sa iya bangud luyag man sini magserbisyo sa mga pumuluyo.
Suno diri, luyag niya maghimo sang mga proyekto agud magnami ang ila barangay, nga mangin malimpyo kag makita man sang mga pumuluyo nga may ginhimo siya nga kaayuhan kaupod ang iban pa nga mga opisyales.
Indi man mapasiguro ni Kap Barrientos kun mapadalagan siya sa masunod nga eleksyon apang kun tagaan siya sang tsansa suno sa iya wala man ini sang problema.
Dugang pa sini nga indi siya pabor nga madayon ang eleksyon agud mapatigayon niya ang plano kag proyekto kun magdugay pa siya sa iya posisyon.
