ROXAS CITY – Ginkumpirmar sang tagdumalahan sang Capiz Provincial Health Office nga may yara sang 1,431 ka mga kabataan naga-edad 5 tubtob 11-anyos ang nabakunahan na sang ila first dose batuk sa COVID-19.
Ini ang ginpahayag ni Dr. Ramon Alex Nolasco, acting provincial health officer, sang mainterview sang Bombo Radyo.
Suno diri, ang nasambit nga numero ang base sa duha ka adlaw sumugod sang nag-umpisa ang vaccination roll out sa amu nga age group, kun sa diin sang Pebrero 15 may yara sang 649 ka mga kabataan ang naturukan sang first dose, samtang 782 naman pagka-aga, Pebrero 16.
Ginpahayag man sini nga manubo ang dosage sang amu nga vaccine nga ginaturok sa mga kabataan sa nasambit nga edad kun sa diin 10mcg lang ini, ikumparar sa 30mcg sa mga kabataan naga-edad 12 tubtob 17-anyos.
Bangud diri, magamay ang nagaangkon sang adverse effects kaangay sang pag-angkon sang lagnat sa mga bata.
Ginpahanumduman man ni Nolasco ang mga ginikanan nga suportahan ang ila mga kabataan nga magpabakuna.
