ROXAS CITY – Nakumpiskar sang mga kapulisan sa magkahagugma ang kapin sa ka milyon nga balor sang shabu kag armas-luthang sa ginkasa nga drug buybust operation sa Barangay Timpas, Panitan Capiz.
Ginkilala ang mga nagkaladakpan nga sanday alyas Janjan, 26-anyos nga residente sang nasambit nga barangay kag alyas Jelay, 25-anyos nga residente naman sang banwa sang Pontevedra.
Sa interview sang Bombo Radyo Roxas kay PMaj. Amie Bulaqueña, hepe sang Panitan Municipal Police Station, ginpahayag sini nga nagdugay sang halos duha ka bulan ang ila ginpatigayon nga monitoring batuk sa mga suspek antes ginkasa ang nasambit nga operasyon.
Naglab-ot naman sa 25 sachets sang shabu ang nakuha sa paghinakop sang mga suspek nga ginabulubanta yara sa P1 milyon ang balor kag P10,000 nga buybust money.
Narekober man sa lugar ang isa ka breaktype homemade 12 gauge shotgun nga loaded sang isa ka bala.
Nagapangatubang sa kaso nga paglapas sa Republic Act 9165 ukon Comprehensive Dangerous Drugs Act of 2002 kag RA 10591 ukon Comprehensive firearms ammunition regulation act ang nasambit nga magkahagugma.
Sa karon nagapabilin ang mga ini sa kustodiya sang Panitan PNP para sa nagakaigo nga disposisyon.
