Nagpasaka sang reklamo ang kapin sa 86 ka mga biktima sang pag-abuso sa pila ka online lending applications (OLAs) suno sa Presidential Anti-Organized Crime Commission (PAOCC).
Suno sa pahayag sang PAOCC, alas 6 pa lang sang aga, nag-abot sa ila talatapan ang mga biktima nga naka-eksperyensya sang pamahog ukon pagpamahog gikan sa online lending applications agud magsumiter sang ila sworn statements.
Ginhatagan pagtamod sang PAOCC nga ang mga ilegal nga pamaagi nga ginagamit sang mga OLA, lakip na ang public shaming, doxing, coercive messaging, kag mga pamahog, maathag nga paglapas sa data privacy, lending regulations, kag tawhanon nga dignidad.
Nag-upod man sa pagpasaka sang reklamo ang United OLA Victims Movement (UOVM). Ang UOVM isa ka civil society organization nga ginapangunahan ni Kikay Bautista, nga nagabulig kag nagagiya sa mga biktima sang online lending harassment.
Suno kay Usec. Gilberto Cruz, ang pagdagsa sang bag-o nga mga reklamo isa ka maathag nga patimaan nga mas madamo nga mga Pinoy ang nagapamat-od nga ipakigbato ang ila kinamatarong kag pakigbatuan ang pagpang-abuso.
Suno sa iya, sa subong, may yara sila sang mga 150 ka pormal nga reklamo, kag ginalauman nila nga magadugang ini samtang nagadamo ang mga biktima nga naga-atubang.
