ROXAS CITY – Ginkumpirma sang tagpamaba sang Roxas Component City Police Station nga may duha tubtob tatlo ka mga bulothoan sa syudad sang Roxas, nga ila sa karon ginamonitor bangud sa report nga ila nabaton nga may pila ka estudyante nga nakuhaan sang iligal nga droga.
Ini ang ginpahayag ni Police Senior Master Sergeant Ramil Arcangeles, sang mainterview sang Bombo Radyo.
Suno kay Arcangeles, gilayon nila nga ginpadulongan ang indi na paghingadlan nga mga bulothoan, matapos nga ginpalab-ot ang amu nga hitabo, rason nga ginpatawag ang mga ginikanan ukon guardian sang mga estudyante.
Ginsiling man sini nga posible naga-penetrate na ang mga drug pusher sa mga eskwelahan, agud mang-engganyo sang mga kabataan.
Ginpahayag man ni Arcangeles nga bilang tikang sang kapulisan, ginsuhestyon nila ang pila ka tips nga mahimo sa mga eskwelahan agud mabantayan ang mga estudyante kaangay sa pagpahamtang sang mga tinawo sa Comfort Rooms (CR) babayi man ukon lalaki, kag iban pa.
Bangud sini, ginpasangkad pa sang kapulisan ang “Buhay ay Ingatan, Droga ay Iwasan” (BIDA) campaign, kun sa diin nagapadulong ang mga ini sa mga eskwelahan, kag sa pagkamatuod madamo pa ang nakalinyada nga mga bulothoan ang ila padulongan, agud mag-conduct sang information drive batuk sa iligal nga droga.
Kinahanglan man suno diri sang kooperasyon sang mga ginikanan, nga i-monitor ang ila kabataan kag kun mahimo matapna sa pagpanigarilyo bangud ini ang posible suguran sa ‘curiosity’ sang mga kabataan nga magtilaw sang ginadumilian nga droga.
