PANITAN, CAPIZ- May yara na sang ginalantaw nga person of interest ang mga katapo sang Panit-an Municipal Police Station sa natabo nga pagransak sang mga kawatan sa isa ka puluy-an sa Barangay Concencia, Panit-an, Capiz.
Sa interview sang Bombo Radyo kay Police Executive Master Sergeant Peter Cabantug, Deputy Chief of Police sang Panit-an Municipal Police Station, iya ginpahayag nga ginsulod sang nasambit nga mga kawatan ang amo nga puluy-an kag gintaban sang mga ini ang isa ka ipad kag cash nga nagabalor P70, 000, branded nga sapatos nga nagabalor P7, 000, kag kapin P150, 000 nga balor sang alahas kag pila pa ka mga kagamitan.
Dugang pa sini nga nakibot nalang ang mga residente sang amo nga puluy-an sang nagtambad sa ila ang nagalalapta na nga mga pagkabutang.
Nahibaluan nga pamaagi sa pagguba sa padlock sang pirtahan sa likod sang amo nga balay, natigayon nga nakasulod ang amo nga mga kawatan.
Sa karon, nagapanawagan ang mga otoridad sa mga nakakita nga kun may ihibalo sa nagluntad nga insidente makig-angut sa ila nga talatapan agud mahatagan sang hustisya ang nasambit nga hitabo.
Interviewed by Bombo Francis Biñas
