Ginabantayan na ang mangin kasal sang anak sang pinaka manggaranon nga tawo sa Asya.
Ini ang ginalauman mangin pinakamagarbo nga kasalan sa India subong nga tuig.
Si Anant Ambani, nga tagapagmana sang bilyonaryo nga pamilya, ang magpakasal sa iya long-time girlfriend nga si Radhika Merchant.
Ini ang ginakabig nga kasalan sang tuig sa India kag ginalauman ang mga dalagkuan nga personalidad nga magatambong sa amo nga selebrasyon.
Nahibaluan nga sadtong Marso, nag-angkon ang magkahagugma sang tatlo ka adlaw nga pre-wedding party sa siyudad sang Jamnagar, nga gintambungan sang mga 1,200 nga kilala nga bisita, kalakip na nanday Mark Zuckerberg kag Bill Gates.
Isa ka magarbo nga light show nga may 5,500 drones ang naghatag sang kasanag sa kalangitan sa may palasyo nga ginpatukod para sa selebrasyon, kun sa diin nagsaot ang mga bisita sa kanta ni Rihanna.
Ang kasal nga ini sa Mumbai ang nakatalana sa Hulyo 12 tubtob 14 sa puluy-an nanday Anant.
Ang venue amo ang 27-floor nga ginatawag nga Antilia, kun sa diin kaya nga magbaton sang masubra sa 16,000 katawo.
