CAMP PERALTA, JAMINDAN, CAPIZ- Opisyal na nga nagsugod subong nga adlaw sang Myerkules, Oktubre 8, 2025 ang Philippines–Australia Army-to-Army Exercise ‘KASANGGA 2025’ sa 3rd Infantry Division, Philippine Army, Camp General Macario Peralta Jr., Barangay Jaena Norte, Jamindan, Capiz.
Sa interview sang Bombo Radyo kay Major General Efren F. Morados, Vice Commander sang Philippine Army, iya ginpahayag nga isa ka dako nga oportunidad para sa mga Filipino Troops partikular sang 3rd Infantry Battalion ang amo nga aktibidad agud ipakita ang tagsa ka mga kinaagman sa depensa.
Suno kay MGen. Morados, ang katuyuan sang joint military exercise amo ang pagpabakod sang defense cooperation sa tunga sang Philippine Army kag Australian Army.
Pahayag pa nya, madamo sang mga nakapanglinyada nga aktibidad ang ginpreparar agud nga mahanas sang maayo ang lunsay mga army sang Pilipinas kag Australia sa diin ginakalakipan ini sang combat operation, jungle warfare training, humanitarian disaster response, drone training, coastal exercise, kag community engagement.
Ginapangunahan ni Captain Emma McDonald-Kerr, Australian Defense Attache sa Pilipinas kag myembro sang Royal Australian Navy ang hubon sang Australian armies.
Yara sa kabug-usan 100 ka mga Australian armies kag 150 ka mga Philippine armies ang magapasakop sa amo nga programa.
Ginalauman sang mga natungdan nga mangin mabinungahon kag mapuslanon ang amo aktibidad kag mas mapabaskog ang kinaagman sa depensa sang tagsa ka mga pungsod pamaagi sa amo nga mga paghanas.
Interviewed by Bombo Roadnie Daban Dalanon
