ROXAS CITY – Amat-amat na nga naga-nubo ang kaso sang Covid-19 sa Shanghai, China matapos ang gulpi nga pagtaas sang numero sang infected cases pagkatapos sang Chinese New Year.
Ini ang ginkumpirmar ni Bombo International Correspondent Emely Peng sang mainterview sang Bombo Radyo.
Suno diri, masobra na isa ka bulan sang nagsugod ang lockdown sa Shanghai kun sa din, tanan nga mga establisyemento ang temporaryo nga ginsarado kag hugot nga gina-dumilian ang pagguwa sa mga puluy-an.
Bangud sa lockdown, tatlo ka beses sa isa ka adlaw ang pagkuha sang swab test sa mga residente agud masiguro ang pagtapna sang balatian kag nagahatag man ang gobyerno sang nagapanguna nga kinahanglanon duwa ka beses sa isa ka semana.
Gintuad man ni Peng nga nagpangayo ini sang bulig sa consolidate sang Pilipinas agud mabuligan ang mga kapareho nga OFW nga tuman nga apektado sa lockdown.
Samtang, wala natigayon ang Overseas Absentee Voting(OAV) nga magasugod kuntani sang Abril 10 bangud sa sitwasyon nga ginapangatubang sang pungsod kag posible nga sa bulan sang Mayo na lamang ipatigayon.
Ginasiguro man ni Peng, nga hilway ang sitwasyon sang tanan nga mga OFW sa pungsod bangud wala man ini napabay-an sang gobyerno.
