ROXAS CITY – Nagtaas ang nabalhag nga kaso sang rabies sang Department of Health (DOH-Capiz) sang 2022 kumparar sang 2021.
Sandig sa datos sang ahensya, naglab-ot na sa 19,999 ang kaso sang rabies sang 2022 samtang 14,689 naman sang 2021 kun sa diin nagtaas sang masobra 5,000 kag 6 diri ang nabalhag nga napatay.
Sa interview sang Bombo Radyo kay Mr. Joeffrey Espiritu, Information Officer sang DOH Capiz, sa nasambit nga numero, nalakip na diri ang mga ginkagat sang bakunado kag indi bakunado nga ido.
Pahayag sini, nga ang rabies ang isa ka sahi sang infection nagikan sa infected nga sapat ilabi na ang ido kag kuring, gani kinahanglan nga mahatagan ini sang nagakaigo nga igtalupangod agud wala sang kabuhi nga mausik.
Yari ang sintomas kun ang isa ka persona ang infected sang rabies:
– lagnat kag pagpalanakit sang ulo
– palanakit sang samad nga ginkagtan sang ido ukon ginkaros sang kuring
– kag ang pinakamalala, nahadlok na ini magtandog kag mabasa sang tubig kag mahanginan.
Panugyan ni Espiritu, nga sa tion nga malawayan, makagat kag makaros sang ginahuptan nga kasapatan gilayon nga hugasan ini sang naga-ilig nga tubig kag sabon, indi pagpaduguon kun may samad kag magpadulong sa Rural Health Unit (RHU) agud matsekyar sang doktor.
Ginklaro man sini nga libre ang bakuna para sa rabies nga ginahatag sang ahensya sa tagsa ka Local Government Unit (LGU) nga may yara sang Animal Bite Treatment Center kag anti-tetanus lang ang kinahanglan bayaran ukon baklon sang pasyente.
