Nagbaylohanay sang mainit nga mga tinaga sanday Senator Francis “Kiko” Pangilinan kag Senate Minority Leader Alan Peter Cayetano bangud sa paggamit ni Philippine Coast Guard Spokesperson for the West Philippine Sea Commodore Jay Tarriela sa caricature nga nagapakita sang nawong ni Chinese President Xi Jinping.
Ang pagbanggianay sang duha ka mga senador ang kasunod sa adoption sang Senado sa ginaduso nga Senate Resolution No. 256, nga nagapakamalaot sa mga pahayag sang Chinese Embassy in Manila batuk sa mga opisyal sang Philippine government nga naga-criticize sa agresibo nga tikang sang Beijing may kaangtanan sa West Philippine Sea.
Sang tion sang interpellation, ginpakigbato ni Cayetano nga indi dapat pag i-adopt ang resolution bangud daw kaangay nga ginasuportahan ang nangin akto ni Tarriela batuk sa Chinese officials.
Ini ang wala naman ginpaboran ni Pangilian sa diin gindepensahan sini si Tarriela kag ginpahayag nga indi sala ang ginhimo sang PCG spokesperson for the WPS.
Nagsabat naman si Cayetano nga daw kaangay nga “okay” lang kay Pangilinan nga himuon nga kaladlawan kag bastuson ang Presidente sang isa ka pungsod.
Liwat naman ini nga wala ginpaboran ni Pangilinan kag ginpahayag nga personal nga interpretasyon lamang ini ni Cayetano.
Pahayag naman ni Cayetano, mahimo nga magpalapta man ang staff sini sang kaladlawan nga laragway ni Pangilinan.
Apang suno kay Pangilinan, indi man siya halin sa China kag ginkwestyon sini kun ngaa himuan siya sang kaladlawan nga laragway bangud daw kaangay nga ginapaanggid lang ang senador ang prutas nga mansanas kag kahel.
Matapos ang malapit tatlo ka oras nga debate, gin-amyendaran ang ginduso nga resolution nga ginpirmahan sang 15 ka mga senador, sa diin kadam-an ang halin sa majority bloc.
Kasunod sang period of amendments, si Senate Majority Leader Juan Miguel Zubiri ang nag-move sa pag-adoptar sang resolution kag ini ang gin-aprubahan ni Senate President Vicente Sotto III nga wala sang objection.
