ROXAS CITY – Aminado ang mga kapulisan sang Roxas City Police Station nga indi na bag-o para sa ila ang madamo nga insidente sang pagpangsulod kag pagpangawat sang mga kagamitan sa magkatuhay nga mga ospital sa syudad sang Roxas.
Ini ang ginpahayag ni Police Lieutenant Colonel Ricardo Jomuad Jr., hepe sang Roxas City Police Station sang mainterview sang Bombo Radyo Roxas.
Suno kay Jomuad nga tuig 2017 tubtob 2018 ang ulihi nga report sang pagpangsulod sang mga kawatan sa isa ka pribado nga ospital antes pa man natabo ang pagpangawat sa Roxas Memorial Provincial Hospital sining damlag lang.
Dugang pa sini nga ang suspek nga responsable sa pagpangawat sa isa ka pribado nga ospital nakaligad nga mga tinuig ang nagapabilin sa karon nga nakahunong sa Bureau of Jail Management and Penology (BJMP).
Ginpahayag ni Jomuad nga nabudlayan pa sila tubtob sa karon sa pagtumod sa suspek nga nagsulod kag nagtaban sang kwarta kag mga importante nga kagamitan sang isa ka bantay sang pasyente sa RMPH sining damlag apang ginpasalig man sini nga ila ini nga pagatutukan tubtob nga mahibaluan kun sino ang yara sa likod sang nasambit nga insidente.//
Samtang, wala naman nagpahanugot nga magpakuha sang bahin ang isa ka pribado nga ospital matapos nga ginapatihan may nagakahinabo man nga kinawatay.
