Ginbasura sang Korte Suprema ang petisyon nga gin-file ni Cassandra Li Ong batuk sa mga committee sang Senado kag House of Representatives nga nagapatigayon sang imbestigasyon sa maanomaliya nga Philippine Offshore Gaming Operators (POGOs).
Base sa desisyon nga ginpirmahan ni Associate Justice Jhosep Lopez nga ginakilala sang Korte Suprema ang Kongreso nga magpatigayon sang hearing in aid of legislation.
Si Ong nalakip sa operasyon sang Lucky South 99 sa Porac, Pampanga nga gin-raid sang otoridad bangud sa ilegal nga operasyon sini.
Ginpahayag ni Ong sa iya petisyon nga ginalapas sang Kongreso ang iya right nga magpaukoy kag ang iya right against self-incrimination.
Gin-akusahan pa sini ang House QuadComm nga nag-abuso sa poder kag lagpas sa hurisdiksiyon sa pagpatigayon sang imbestigasyon bangud ginapilit siya nga maghatag sang impormasyon.
Ginpahayag sang Korte Suprema nga ang legislative power sang Kongreso naka-base sa 1987 Constitution gani wala nakit-an nga paglapas.
Si Ong kag iban pa naga-atubang sa kaso nga qualified human trafficking nga gin-file sang Abril.
