PONTEVEDRA, CAPIZ- Na-rescue sang otoridad ang pito (7) ka mga babaye sa ginsalakay nga KTV Bar sa Barangay Poblacion Ilawod, Pontevedra, Capiz, Hulyo 23, 2025.
Sa interview sang Bombo Radyo kay Police Captain Merry Chris Dela Cruz, tigpamaba sang Capiz Police Provincial Office, iya ginpahayag nga ginpangunahan sang Women and Children Protection Center- Visayas Field Unit (WCPC- VFU) ang nasambit nga operasyon kaupod ang Police Regional Office 6, Regional Women and Children Protection Desk kag iban pa nga natungdan nga ahensya sang gobyerno.
Dugang pa sini, ginlibot sang mga otoridad ang mga KTV Bar sa Barangay Binuntucan, Bailan, Tacas kag Barangay Poblacion Ilawod. Wala naman sang na-rescue nga kababayenhan sa mga KTV Bar sa tatlo ka barangay magluwas sa Poblacion Ilawod nga yara sa sentro sang nasambit nga banwa.
Naaresto naman ang ginaalegar tag-iya sang KTV Bar nga isa ka babaye kag timbang sini nga lalaki kag yara na sa karon sa kustodiya sang Pontevedra Municipal Police Station.
Samtang, yara naman sa paghinakop sang Women and Children Protection Center- Visayas Field Unit (WCPC- VFU) ang mga na-rescue nga kababainhan.
Interviewed by Bombo Francis Biñas
