ROXAS CITY, CAPIZ – Wala mabatyagan sang mga mamumugon ang pag-uswag sa pungsod nga ginpahayag ni President Ferdinand Marcos Jr. sa iya ika-apat nga State of the Nation Address (SONA).
Sa interview sang Bombo Radyo Roxas kay Wennie Sancho, Secretary General sang General Alliance of Workers Association (GAWA), iya ginpahayag ang pagkadismaya sang ila nga hanay sa kakulangan sang konkreto nga sabat sa mga nagapanguna nga problema sang sektor sang trabaho.
Suno kay Sancho, apisar ginakilala sang GAWA ang pila ka positibo nga proyekto sang administrasyon kasubong sang mga imprastruktura kag economic development initiatives, indi ini sa gihapon ini bastante agud mabuhinan ang naeksperyensyahan nga kabudlay sang kinaandan nga Pilipino, ilabi na sang mga mamumugon.
Dugang pa sang natungdan, indi maathag kun paano sabton sang gobyerno ang madugay na nga problema sa manubo nga pasweldo, job security, kag access sa maayo nga pangabuhi.
Bangud sini, ginhatagan sang GAWA sang rating nga 5 sa scale nga 1 tubtob 10 ang SONA sang Presidente, isa ka simboliko nga marka sang kakulangan sang administrasyon sa mga konkreto nga aksyon para sa mga mamumugon.
Panawagan sang grupo, indi pagbalewalaon ang labor sector, kundi hatagan sang pagtamod ang mga ginasinggitan sini agud matuod nga mabatyagan sang pumuluyo ang ginapahayag kauswagan sang pungsod.
– Interviewed by: Bombo Daren Salomeo Henson
