Nagpaandam ang Philippine Institute of Volcanology and Seismology (PHIVOLCS) sa publiko sa posibilidad sang lahar flow sa Bulkan Kanlaon bangud sa asud-asod nga mga pag-ulan.
Sa 24-hour monitoring period humalin sini nga Disyembre 14 kag 15, na-record ang 14 volcanic earthquakes kag naobserbahan man ang padayon nga pagpaguwa sini sang mga gas kasubong sang sulfur dioxide.
Gin-abisuhan ang tanan nga publiko nga likawan na ang pagpadulong sa mga suba, waterways kag iban pa nga posible pagailigan sang lahar.
Ginpanugyanan man nga magpamati ang Publiko sa lokal nga gobyerno kun ini magapatigayon sang mga pre-emptive evacuation bangud sa posible nga mangin epekto sang lahar kun sa diin posible nga ma-washout sang dalagkuan nga bato kag duta ang mga kasubaan kag matabunan sang lutak ang tanan nga kabalayan nga malapit sa nasambit nga bulkan.
Samtang, ginmanduan naman sang ahensya ang LGUs nga mag-monitor sang ila nga mga weather condition kag rainfall warnings.
Sa karon nakataas sa alert level 3 ang bulkan Kanlaon bangud gihapon sa asud-asod nga volcanic activity sini.
