ROXAS CITY, CAPIZ- Arestado ang isa ka lalaki matapos nga nakuhaan sang apat ka mga bala sang caliber .45 nga armas-luthang kag isa ka hand grenade sang mga kapulisan sa Barangay Dayao, Roxas City.
Ang arestado amo si alyas “Moros”, 28-anyos, temporaryo nga nagapuyo sa nasambit nga barangay kag tumandok sang Barangay Tanque sa amo nga syudad.
Sa interview sang Bombo Radyo kay Punong Barangay Winnie Batuampo sang barangay Dayao, ginpahayag nga ang madinalag-on nga implementasyon ang ginpatigayon sang Capiz Police Provincial Office – Intelligence Unit kaupod ang Roxas City Police Station kag Provincial Explosive Canine Unit of Capiz.
Nahibaluan nga ang arestado naulamid sa natabo nga shooting incident nag nagluntad sa Sitio Cassandra, Barangay Punta Tabuc, Roxas City.
Samtang, nagapangatubang ini sa kaso nga paglapas sa Republic Act 10591 ukon ang ‘Comprehensive Firearms and Ammunition Regulations Act’ kag Republic Act 9516 ukon ang ‘Unlawful Possession of Explosives.’
Sa karon, yara na ini sa kustodiya sang mga kapulisan para sa nagakaigo nga disposisyon.
Interviewed by Bombo Francis Biñas
