Arestado ang isa ka lalaki matapos mabaklan sang indi lisensyado nga armas-luthang kag nakuhaan sang iligal nga droga sa ginpatigayon nga buy bust operation sa Barangay San Jose, Dumalag, Capiz.
Ginkilala ang nadakpan kay alyas “Russell”, 22-anyos nga residente sang barangay Santo Angel, sa nasambit nga banwa.
Sa pagpakig-angut sang Bombo Radyo kay PCPT. Jaypee Silvestre, Officer In Charge sang Dumalag MPS, natigayon nga madakpan si alyas “Russel” pinaagi sa isa ka pulis nga nagpakuno-kuno poser-buyer.
Nakuha sa paghinakop sang nadakpan ang isa (1) ka unit sang calibre .38 nga armas-luthang nga wala sang serial number kag tatlo ka mga bala, isa ka unit sang pistol type homemade 5.56 mm nga wala sang serial number kag apat ka mga bala, P100.00 nga marked money, P5,000.00 nga buybust money, isa (1) ka sachet sang ginapatihan shabu, isa ka sling bag kag aluminum foil.
Mahibaluan nga madugay na nga gina-monitor ang nadakpan bangud may record naman ini sa ila nga barangay may kaangtanan sa kaso nga pagpangawat. Samtang, magapangatubang ini sa kaso nga paglapas sa Republic Act 9165 ukon Comprehensive Dangerous Drugs Act of 2002, RA 10591 ukon Comprehensive firearms ammunition regulation act kag ang pagbayolar sa Comelec Gun Ban.
Sa karon yara na sa kustodiya sang Dumalag MPS si alyas “Russel” para sa nagakaigo nga disposisyon.
