Dakop ang isa ka 44-anyos nga lalaki matapos gin-alegar nga nagtuyo nga mangawat sa isa ka balay sa Brgy. 3, Roxas City.
Ang biktima amo si alyas Sam, 48-anyos kag residente sang Lopez Jaena Street, samtang ang suspek naman amo si alyas Fred, residente man sang amo nga barangay.
Sa inisyal nga iimpormasyon nga nakuha sang Bombo Radyo nagikan sa Roxas City Police Station, ginpahayag nga las 4:30 sang hapon sang nakit-an sang biktima ang kawatan sa likod sang iya puluy-an nga nagapanghikot kag ginapatihan nga tuyo kuntani sini nga mangawat.
Gilayon man nga nagpangayo sang bulig ag biktima sa mga miyembro sang Barangay Peacekeeping Action Team (BPAT) nga nagaroving sa lugar.
Pinaagi sa madasig nga pagresponde, nadakpan ang suspek kag gin-turn over sa Roxas City Police Station.
Nadiskubre man nga ginuba sang kawatan ang kandado sang gate agud nga magkasulod kuntani sa puluy-an sang biktima.
Sa subong yara na ini sa kustodiya sang Roxas Component City Police Station para sa ngakaigo nga desposisyon.
