ROXAS CITY – Nagapabilin sa Roxas Memorial Provincial Hospital (RMPH) ang 28-anyos nga lalaki matapos nag-angkon sang pilas tuga sang pagpanglabo sa iya dalunggan sa Barangay Aglalana, Dumarao, Capiz.
Ginkilala ang biktima kay Valentine Rozales Billones, alyas “Ron-Ron.”
Samtang ang suspek ang ginkilala kay Alfie Baldeo Parcon, 32-anyos, chainsaw operator kag lunsay mga residente sang nasambit nga barangay.
Sandig sa inisyal nga imbestigasyon sang mga katapo sang Dumarao MPS, nga alas-9:45 kagab-i, Hunyo 5, sang nagalakat ang biktima padulong sa balay sang suspek agud komprontahon sa ila nauna nga pag-inaway sa isa ka kaadlawan sa ila lugar.
Apang sang yara na sa madulom nga bahin sang dalan ang biktima, hinali nagtuhaw si Parcon kag ginlabo si Billones sa iya nawala nga dalunggan gamit ang bitbit nga talibong sang suspek.
Nakit-an ini sang duha ka mga Brgy. Tanod nga nagsunod sa biktima.
Madasig man nga nagdalagan palayo ang suspek sa wala mahibaluan nga direksyon.
Ginalantaw sang mga kapulisan nga motibo sa insidente, amu ang kahulugbon.
Sa karon, nagapadayon nga ginapangita ang suspek kag ang imbestigasyon sa insidente.
