Isa ka 45-anyos nga Emergency Room physician sa Fairborn, Ohio, nga si Dr. Scott Koncal, ang opisyal nga nagbutang sang bag-o nga Guinness World Record pagkatapos nga ginsulod ang 91 ka palito sa iya ilong.
Apisar nga sanay si Dr. Koncal sa pagkuha sang mga butang nga aksidente nga ginsulod sa lawas sang mga pasyente, siya mismo ang nagsulod sang mga palito sa iya ilong agud malab-ot ang iya madugay na nga handum nga makarekord.
Ang proseso naglawig sang 15 minutos, nga nasaksihan sang iya mga kaupod nga mga nurse kag mga medical students.
Suno sa doktor, indi na kinahanglan nga isulod sang madalom ang mga Palito, kay amat-amat nga nagaunat ang mga buho sang ilong, rason nga mahapos lang para sa iya nga magdugang pa sang mga palito sulod sa iya ilong.
Sa katapusan, luwas nga napaggwa ni Dr. Koncal ang tanan nga 91 ka Palito pagkatapos sang hangkat.
Apang nagpaandam ang Guinness kag si Dr. Koncal nga indi ini dapat paghimuon sang publiko nga wala sang nagakaigo nga paghalong.
