Madugay na nga ginamonitor sang mga katapo sang Capiz Maritime Police Station ang lalaki nga naaresto matapos nga gin-implementaran sang search warrant sa Barangay Milibili, Roxas City.
Ginkilala ang amo nga lalaki kay alyas “Cesar” yara sa legal nga pang edaron kag temporaryo nga nagapuyo sa nasambit nga lugar.
Suno kay PCPT. Semdan sitchon, hepe sang Capiz Maritime Police Station, ginpahayag nga sang nakaligad pa nga bulan sang Nobyembre 2024 ang monitoring nila sa amu nga lalaki.
Ginpatigayon ang amo nga operasyon sang tion nga bastante na ang ila nangin ebidensiya sa pag-implementar sang nasambit nga search warrant.
Dugang pa sini, ginaalegar nga may yara na sa tatlo ka bulan ang pagpatigayon sang pagbaligya sang mga smuggled cigarettes sang amu nga persona.
Mahibaluan nga nakuha sa paghinakop sini ang anum (6) tanan ka mga dalagkuan nga karton nga may sulod nga mga sigarilyo sa nagakalain-lain nga mga brand nga nagabalor P300,000.
Magapangatubang ini sa mga kaso nga pagbayolar sa Section 1401 ukon ang “Unlawful Importation or Exportation” sang RA 10863 ukon ang “Custom Modernization and Tariff Act” and RA 10643 ukon ang “Graphic Health Warning Act of 2013”.
Sa karon, nagapabilin pa sa paghinakop sang Roxas City PNP, para sa nagakaigo nga disposisyon.
