ROXAS CITY – Nagpanginpadlos nga ginkasahan sang mga katapo sang Provincial Drug Enforcement Unit (PDEU) sang drug buy-bust operation ang 26-anyos nga lalaki sa Barangay VII, sini nga syudad.
Ginkilala ang suspek kay Gino Alorico Rocero alyas ‘Kiwit’ nga residente sang Barangay Dayao, sini nga syudad.
Nakuha sa kontrol kag posesyon ni Rocero ang tatlo tanan ka sachet sang suspected shabu kag P6,500 nga buy-bust money.
Ginpanginwala ini sang suspek nga iya ang nakuha nga mga ginaalegar iligal nga droga bangud nagasaka lang ini sa lubi sang hinali nga ginkasahan.
Apang, sa interview sang Bombo Radyo kay PMaj, Francisco Paguia, hepe sang PDEU, nga ‘mala-palos’ ang hulag sang suspek bangud nagligad pa ini nga tuig ginatinguhaan nga madakpan apang masami nga nakabatyag.
Sa karon, yara na ini sa kustodiya sang Roxas City PNP kag natalana nga pasakaan sang panumbungon sa paglapas sa RA 9165 ukon Comprehensive Dangerous Drugs Act of 2002.
Matandaan nga sang Enero 14, sini nga tuig sang ginreklamo sang isa ka traffic enforcer si alyas ‘Kiwit’ matapos nga nagpark ini sa pedestrian lane, sa atubang sang Bakery sa Burgos Ilawod, apang sa baylo nga magpati, nagpangbunggo pa ini sang ginamaneho nga traysikol kag nalagyo.
