ROXAS CITY – Padayon nga ginabulong sa Roxas Memorial Provincial Hospital ang 34-anyos nga lalaki matapos ginaalegar gintiro sang duha ka wala makilala nga persona sa Barangay Pondol, President Roxas, Capiz.
Ginkilala ang biktima kay Ludovico Barrogo, residente sang Barangay Sangkal, President Roxas, Capiz.
Suno kay Albert Besa, abyan nga nagbulig sa biktima alas singko kaina sang aga sang nagpangayo sang bulig ang Si Barrogo matapos ini gintiro samtang nagapadulong sa iya ginaubrahan sa Barangay Casanayan, Pilar, Capiz.
Ginpahayag ni Besa nga ginkatingala sini nga may nagtiro sa iya abyan bangud wala ini sang nahibaluan nga kaaway ang biktima
Samtang suno kay Police Master Sergeant Rez Bernardez, imbestigador sang President Roxas Municipal Police Station nga padayon ang ila nga imbestigasyon agud matumod ang responsable sa insedente.
Apang nagaguwa sa inisyal nga pagpangusisa sang kapulisan nga nagalakat si Barrogo sang nag-agi ang duha ka lalaki nga naka-motorsiklo.
Sa kakibot sang biktima hinali lamang ini nga gintiro gamit ang ginaalegar .45 kalibre nga armas sa diin nag-angkon ini sang pilas sa pila ka parte sang lawas.
