SIGMA, CAPIZ – Nagaguwa sa imbestigasyon sang kapulisan nga nagagamit sang iligal nga droga ang lalaki nga nadakpan nga nagpangawat sang motorsiklo sa Barangay Mianay, Sigma, Capiz.
Ini ang ginpahayag ni PCAPT Mark Anthony Garcia, Hepe sang Sigma Municipal Police Station sang ma-interview sang Bombo Radyo.
Matandaan nga ginkilala ang nadakpan kay Gerald Bebita, 31-anyos nga residente sang Barangay Tabuc, Pontevedra, Capiz.
Antes paman ini naaresto sang kapulisan, nadakpan ini pinaagi sa pagbuligay sang mga residente sa nasambit nga lugar.
Suno kay PCAPT Garcia nga posible nga nahimo ni Bebita ang magpangawat agud may isustento sa iya sini nga bisyo.
Pahayag pa sini nga may record man ang amu nga lalaki sa pagpangawat sa Pontevedra kun sa diin ginkuha man sini ang isa ka motorsiklo nga amu ang iya ginsakyan antes nadakpan sa banwa sang Sigma.
Panugyan ni Garcia sa mga pumuluyo nga halungan ang ila mga pagkabutang kag indi basta magbilin sang motorsiklo sa bisan diin lang.
