Ginpasakaan sang panumbungon nga direct assault in person of authority ang 31-anyos nga lalaki nga nagpangsumbag sang barangay kapitan sang Barangay Ambilay, Panitan, Capiz.
Nakahunong karon sa karsel sang Panitan PNP ang ginareklamo nga si Alejandro Diaz Jr., matapos nga sumbagon sa tiyan si Kapitan Juan Baulite.
Ba-se sa imbestigasyon sang Panitan PNP nga hubog si Diaz sang nagpadulong sa barangay hall.
Ginpalapitan ini ni Kapitan Baulite, mga tanod kag kagawad sang barangay, apang hinali sini nga ginsumbag ang punong barangay.
Matapos ang insedente, gilayon nga nagdalagan pauli sa ila balay si Diaz nga ginlagas sang grupo ni Kapitan Baulite.
Apang pag-abot sang grupo ni Baulite sa balay ni Diaz, ginsugata sila sang suspek nga may bitbit nga kutsilyo kag tuyo bun-on ang isa ka BPAT member.
Apang napunggan ini sang iya amay kag nakuha ang kutsilyo sa suspek tobtob gindala sa istasyon sang pulisya.
