PRESIDENT ROXAS, CAPIZ – Pilason ang isa ka lalaki matapos ginlabo ini sang may utang sa iya sa Sitio Lagubang, Barangay Poblacion, President Roxas, Capiz.
Ginkilala ang biktima nga si Rosaniko Alba, 28-anyos, samtang ang suspek naman ang ginkilala kay Philip Daliva, 42-anyos nga lunsay mga residente sang nasambit nga lugar.
Sa inisyal nga impormasyon nagikan sa President Roxas PNP, ginpahayag nga ginkadtuan sang biktima ang suspek sa ila nga balay agud manukot kun sang utang apang wala nagkasugot ang duha tubtob naglab-ot sa mainit nga pagbinaisay kag nagresulta sa paglabo sang suspek sa biktima.
Pilas sa nawala nga butkon kag dughan ang naagom sang biktima nga gilayon naman nga gindala sa ospital para sa nagakaigo nga pagbulong.
Samtang, boluntaryo naman nga nag-surrender ang suspek sa kapulisan pagkatapos sang nasambit nga insidente kag priso ini sa karon sa President Roxas Municipal Police Station para sa nagakaigo nga disposisyon.
