Ginbawian na sang hulam nga kabuhi ang isa ka lalaki nga naipit sang duha ka salakyan sa nagluntad nga vehicular accident sa Barangay Banica sang damlag lang.
Matandaan nga ginkilala ang biktima nga driver sang motorsiklo kay Henry Coronado, yara sa legal nga pang-edaron kag residente sang Brgy. Dumulog, Roxas City samtang ang driver naman sang Nissan Sedan ang ginkilala kay Abel Acolentaba, 57-anyos, government employee sakay ang iya asawa nga si Anita Acolentaba residente sang Brgy. Cabugao Oeste Panay, Capiz. Ang driver naman sang Toyota Fortuner ang ginkilala kay Sunny Dalida, 62-anyos, retired seaman kag residente sang St. Francis Subd., Barangay Tanque kag ang ginatudlo nga driver suspek ang ginkilala kay Mycar Bacelonia, 42-anyos kag residente sang East Groove Subdivision Brgy. Banica, sining syudad.
Sa nakuha nga impormasyon sang Bombo Radyo nagikan sa Roxas City PNP, ginapahayag nga samtang yara sa wala nga dalan si Bacelonia sakay sang iya salakyan kag magatabok kun tani sa pihak nga dalan aksidente ini nga nadulaan sang kontrol sa iya nga pagmaneho. Kabangdanan agud bumunggo ini sa motorsiklo ni Coronado nga nagikan sa banwa sang Panay kag padulong kun tani sa syudad sang Roxas.
Bangud sa impact, aksidente man ini nga bumunggo sa Nissan Sedan nga ginamaneho ni Acolentaba nga nagikan naman sa syudad kag padulong naman kun tani sa banwa sang Panay. Apang naulamid man ang naka-parada nga Toyota Fortuner nga salakyan ni Dalida.
Nag-angkon sang patal nga pilas sa magkatuhay nga parte sang lawas si Coronado nga madasig naman ginrespondihan sang katapo sang Roxas City Emergency Response Team (RCERT) agud hatagan sang pauna nga pagbulong antes ginpadangat sa isa ka pribado nga ospital apang ginbawian man ini sang hulam nga kabuhi samtang ginabulong sa ospital.
Maswerte naman nga wala napilasan sanday Dalida kag driver sang Nissan Sedan.
Sa karon, yara na sa kustodiya sang Roxas City PNP ang mga imbolbado nga mga behikulo para sa nagakaigo nga disposisyon.
