ROXAS CITY – Ginapahayag nga nakainum sang makahulubog nga ilimnon ang lalaki nga ginbawian sang kabuhi, matapos maaksidente ang ginasakyan sini nga motorsiklo sa Barangay Adlawan, Roxas City.
Ini ang ginkumpirmar ni Punong Barangay Roberto Ross Roldan sang Barangay Adlawan, Roxas City sang mainterview sang Bombo Radyo.
Matandaan nga ginkilala ang biktima kay alyas “Kenneth”, yara sa legal nga pang-edaron kag residente sang nasambit nga lugar.
Suno kay PB Roldan, nagikan sa balay sang iya ugangan ang biktima matapos nga nagdul-ong sang gatas sang iya bata apang antes ini nagpauli nag-inum-inum ini kaupod ang iya mga abyan kag nakapauli na sang maga-aga.
Ginsuway man suno diri sang iya himata nga magpahuway na lamang apang nagpamilit suno diri ang biktima nga magpauli.
Pahayag ni Roldan nga base sa kuha sang cctv footage malapit sa lugar nga ginluntaran sang insidente, nag-overtake ang biktima sa kasunod sini nga traysikol kag aksidente nga nagderitso bunggo sa poste sang kuryente.
Bangud sa makusog nga impact, nag-angkon sang patal nga pilas ang biktima kabangdanan sang iya gulpi nga kamatayon.
Gintinguhaan pa suno diri nga dal-on sa ospital ang biktima agud hatagan kuntani sang nagakaigo nga pagbulong apang gindeklarar ini nga dead on arrival sang doctor.
Mahibaluan nga sang natabo ang insidente may yara man nga suksok nga helmet ang nasambit nga biktima.
Sa karun, yara na ang bangkay sang biktima sa punerarya kag nagapati ang pamilya nga wala sang foul play nga natabo sa nagluntad nga insidente.
Panugyan sang Punong Barangay nga indi mag-inum sang sobra-sobra kag magpabilin sa kaugalingon kung magapauli na.
