ROXAS CITY – Madugay na nga ginakuha sang iya magulang ang lalaki nga nasapwan-patay sa Gomez Street, Barangay IV, Roxas City, apang indi ini mag-upod.
Matandaan nga wala na sang kabuhi sang makit-an si Raymondo Andrade, 40-anyos kag residente sang Barangay Libas sining syudad.
Sa interview sang Bombo Radyo kay Barangay Kagawad Lester Arcangeles, ginpahayag sini nga sumugod nagtaliwan ang mga ginikanan ni Andrade gintinguhaan nga kuhaon ini sang iya magulang apang indi ini mag-upod.
Suno kay Arcangeles nga wala nila ini ginahatagan sang kwarta sa baylo pagkaon na lamang bangud ginabakal lamang sang biktima sang makahulubog nga ilimnon.
Mahibaluan nga nakabaton na lamang siya sang tawag nagikan sa pumuluyo kun sa diin ginapahayag nga wala na sang kabuhi si Andrade.
Bangud sini, gilayon siya suno diri nagtawag sa Capiz Emergency Response Team (CERT) agud magpangayo sang responde apang ginpahayag nga pila na ka oras nga wala na sang kabuhi ang biktima.
Sa karun, nagahulat na lamang ang barangay kun anu ang mangin plano sang pamilya sa nagluntad nga insidente.
