Lalaki nga tulog, patay sa sunog sa banwa sang Dumarao

ROXAS CITY – Patay ang 48 anyos nga lalaki nga nagakatulog samtang nagakasunog ang hulot sang iya balay sa human sa light materials sa Sitio Kabangahan Daku, Gibato, Dumarao, Capiz.

Ginkilala ang biktima nga si John Mark Malones, laon kag nagaisahanon nga naga-estar sa nasambit nga lugar.

Sandig inisyal nga imbestigasyon sang pulisya, may nakakita nga hubog nga nagpauli ang biktima kag nagapanigarilyo sa sulod sang iya balay.

Posible nga nakatulog ang biktima kag wala mapatay ang sindi sang upos sang iya nga sigarilyo.

Bangud diri madasig nga naglapta ang kalayo sa kabilugan sang hulot kun sa diin nagakatulog ang biktima nga nagresulta sa iya nga kamatayon.

Nagalab-ot naman sa P30, 000 ang kahalitan sa nasambit nga sunog.