Arestado ang isa ka lalaki matapos nga ginserbihan sang warrant of arrest sang mga katapo sang kapulisan sa Barangay Calitan, Panay, Capiz.
Ginkilala ang akusado kay alyas David, yara sa legal nga pang-edaron kag residente sang Brgy. Naisud, Ibajay, Aklan.
Samtang, nadakpan man sa nasambit nga operasyon sang mga otoridad si alyas Sheila, yara sa legal nga pang-edaron kag residente sang Brgy. Dabong, Janiuay, Iloilo nga kaupod ni alyas David sang ini ang nadakpan.
Natigayon nga madakpan si alyas David kaupod si alyas Sheila pinaagi sa gintingub nga pwersa sang Criminal Investigation Detention Group (CIDG-6), Regional Intelligence Unit (RIU), Philippine Army, Capiz Police Provincial Office (CPPO) kag Panay Municipal Police Station.
Nahibaluan nga ginaalegar ang mga nagkaladakpan nga anay miyembro sang New People’s Army (NPA).
Nakuha sa paghinakop sang mga ini ang isa (1) ka IED Clamortype, isa ka Fragmentation Hand Grenade, isa (1) ka unit sang caliber .45 pistol Colt, tatlo ka magasin, kag 14 rounds sang live ammunition sang caliber .45.
Nagapangatubang sa kaso nga murder ang akusado nga si alyas David.
Ang warrant of arrest ang gin-issue kag ginpirmahan ni Hon. Sheila Martilino-Cortes, Judge of RTC Sixth Judicial Region, Kalibo, Aklan nga napetsahan sadtong Disyembre 17, 2004.
Wala naman sang ginrekomendar nga piyansa ang korte para sa temporaryo nga kahilwayan sang mga akusado.
Sa karon, yara na sa kustodiya sang Criminal Investigation and Detection Group (CIDG-6) ang mga nagkaladakpan para sa nagakaigo nga disposisyon.
