SIGMA CAPIZ – Patay ang lalaki, matapos aksidente nga mabungguan sang salakyan samtang nagabatok sa dalan sa Barangay Parian, Sigma Capiz.
Sa interview sang Bombo Radyo sa hepe sang Sigma Municipal Police Station nga si PCapt. Mark Anthony Garcia, ginpahayag sini nga ginkilala ang biktima kay alyas “sidro” residente sang nasambit nga lugar, samtang ang driver suspek ang ginkilala kay alyas “Cris” 33-anyos kag residente sang Dingle, Iloilo City.
Suno kay Garcia, sang natabo ang insidente samtang ginasubay nanday alyas “Cris” ang dalan nagikan sa syudad sang Roxas kag papauli na kun tani pag-abot sa lugar hinali lamang nga nagtabok sa dalan ang biktima.
Bangud gulpi ang natabo wala na suno diri nakontrol sang driver suspek ang iya pagmaneho agud kun tani nga magpreno.
Mahibaluan nga kaupod sang driver suspek ang iya sini pamilya nga nagikan sa The Sacred Heart of Jesus Shrine sa Dinginan, Roxas City, Capiz nga nagsimba.
Nag-angkon sang pilas sa magkatuhay nga parte sang lawas ang biktima nga madasig naman ginpadangat sa Mambusao District Hospital agud kun tani dapatan sang nagakaigo nga pagbulong apang gindeklarar ini nga dead on arrival sang doctor.
Samtang, nagkasugot naman ang magtimbang nga bahin nga ihilway ang driver suspek sa baylo nga sabton ang tanan nga gastos pinansyal sang nasambit nga biktima.
Panugyan sang hepe sa publiko ilabi na sa mga nagamaneho sa kagab-ihon kag nagatabok sa dalan nga mangin alerto kag lantawon ang dalan agud malikawan nga matabo ang kaangay sini nga insidente.
