JAMINDAN, CAPIZ – Patay ang isa ka lalaki matapos nga bumunggo ang ginamaneho sini nga motorsiklo sa isa ka army truck sa Barangay Linambasan, Jamindan, Capiz.
Sa impormasyon nga nakuha sang Bombo Radyo nagikan sa Jamindan Municipal Police Station, ginkilala ang biktima kay alyas “Zar”, 30-anyos, kag residente sang Brgy. Jaena Norte, sa nasambit nga banwa.
Ginpahayag nga samtang ginasubay sang biktima ang dalanon padulong kuntani sa Barangay Jaena Norte sa amu nga banwa hinali nalang ini nga bumunggo sa likod nga bahin sang isa ka army truck.
Bangud sa impact sang pagkabunggo, nag-angkon sang patal nga pilas sa ulo kag lawas ang biktima nga gilayon naman nga gindala sang katapo sang Jamindan MDRRMO sa Mambusao District Hospital, apang gindeklarar nga dead on arrival sang doktor nga nag-atendir.
Sa karon, yara na ang bangkay sini sa isa ka punerarya sang nasambit nga banwa.
