Isa patay, samtang apat naman ang nagkalapilasan sa nagluntad nga vehicular accident sa tunga sang angkar-angkar kag motorsiklo sa Sitio Ibilan, Barangay Maninang, Sapian, Capiz.
Ginkilala ang ginbawian sang kabuhi kay alyas “JP”, 25-anyos, driver sang motorsiklo kag residente sang Barangay Bilao sa nasambit nga banwa. Samtang, ang mga nagkalapilasan naman amo sanday alyas Almer, 49-anyos, driver sang angkar-angkar kag ang tatlo sini nga mga sakay kalakip ang misis sini nga lunsay mga residente sang Barangay Poblacion, Sapian, Capiz.
Sandig sa inisyal nga impormasyon sang Bombo Radyo nagikan sa Sapian Municipal Police Station, ginapahayag sini nga na Maga-overtake kuntani si alyas JP sa isa pa ka motorsiklo, apang wala sini madiparahan ang kasugata sini nga trisikol nga ginamaneho ni Almer kabangdanan nabungguan nya ini.
Dugang pa nga suno sa mga nakasaksi nga residente sa lugar wala sang suga ang motorsiklo nga ginamaneho ni JP.
Nahibaluan nga papauli na kuntani ang magtimbang nga bahin sang nagluntad ang aksidente.
Gilayon naman nga gindala sa Mambusao District Hospital si JP para kuntani sa nagakaigo nga pagbulong, apang gindeklarar ini nga dead on arrival sang nag-atendir nga doktor. Samtang, gindala naman sa isa ka ospital sa syudad sang Roxas si alyas Almer kag kaupod tatlo sini ka mga kaupdanan para sa nagakaigo nga pagbulong.
Sa karon, padayon pa ang ginahiwat nga imbestigasyon sang mga kapulisan angut sa nasambit nga aksidente.
