ROXAS CITY – Pilason ang 33-anyos nga lalaki, matapos nga ginbuno sang iya kaupod sa ilimnan, sa Barangay Baye-Baye, Jamindan, Capiz, alas-9:20 kagab-i, Pebrero 17.
Ginkilala ang biktima kay John Red Luces Villeza, isa ka mamumugon.
Samtang ang ginatudlo suspek amu si Henry Ordaniel Kintayo, 53-anyos, kag lunsay mga residente sang nasambit nga barangay.
Sandig sa impormasyon nga nakuha sang Bombo Radyo sa Jamindan Municipal Police Station, nagaguwa sa ila inisyal nga imbestigasyon nga magkaupod nga nag-inom sang makahulubog nga ilimnon ang biktima kag suspek, apang ginpahayag nga ginbanggaan sang suspek ang nasambit nga biktima kag hinali nga ginbuno.
Naigo sa natuo nga bahin sang dughan si Villeza nga gilayon gindala sang ila kasilingan sa opisina sang Municipal Disaster Risk Reduction and Management (MDRMM) Jamindan para sa pauna nga pagbulong, antes ginpadangat sa pinakamalapit nga ospital.
Samtang ang suspek ang gin-turnover ni Retired SPO4 Nestor Ordaniel sa mga kapulisan para sa nagakaigo nga disposisyon.
Nagaguwa sa imbestigasyon nga hinubog ang motibo sa insedente.
